Avval xabar berganimizdek, zavodning 65 yilligi munosabati bilan korxonamiz tarixi haqida hikoya qiluvchi maqolalar turkumini boshladik.
Ruknni davom ettiramiz.
O‘zbekiston neftni qayta ishlash sohasidagi yirik korxonalardan biri – Farg‘ona neftni qayta ishlash zavodi (FNQIZ) joriy yilda o‘zining 65 yilligini nishonlamoqda. O‘tgan yillar davomida zavod standart ishlab chiqarish korxonasidan jahon bozorida raqobatlasha oladigan ilg‘or kompleksga aylandi.
FNQIZ tarkibida oltingugurt birikmalari ko‘p bo‘lgan mahalliy xom ashyoni qayta ishlashga o‘tgan 1995-yil zavod tarixidagi muhim bosqichlardan biriga aylandi. Bu zavod oldiga yangi vazifalarni qo‘ydi: avval ishlab chiqarilgan mahsulotlarning assortimenti va sifatini saqlab qolish, shuningdek, raqobatbardosh mahsulotlar ishlab chiqarish uchun yangi zamonaviy texnologiyalarni o‘zlashtirish zarur edi.
Ushbu muammolarni hal qilish uchun O‘zbekiston Respublikasi Vazirlar Mahkamasining 1996-yil 12-noyabrdagi 397-sonli qarori qabul qilindi va uning doirasida Yevropa tiklanish va taraqqiyot banki (YETTB) hamda Yaponiyaning ESKIM bankini jalb etgan holda investitsiya dasturi ishlab chiqildi. Dasturning asosiy maqsadi xalqaro standartlarga javob beradigan yengil neft mahsulotlari sifatini ta’minlash va ekologik vaziyatni yaxshilash maqsadida zavodni rekonstruksiya qilishdan iborat edi.
Rekonstruksiya loyihasi Yaponiyaning “Mitsui” va “Toyo Engineering” kompaniyalariga ishonib topshirilgan bo‘lib, moliyalashtirish hajmi 200 million AQSH dollaridan oshdi. 1999-yil avgust oyida dizel yoqilg‘isini gidrodesulfurizatsiya majmuasi (GDS) foydalanishga topshirildi, bu zavod uchun muhim qadam bo‘ldi. Ushbu qurilma nafaqat oltingugurt miqdori 0,05% dan ko‘p bo‘lmagan yuqori sifatli dizel yoqilg‘isini ishlab chiqarish imkonini berdi, balki elementar oltingugurt ishlab chiqarish bo‘yicha hamroh obyekti tufayli ekologik xavfsizlik masalalarini hal qildi.
-1999-yilda qurilib, foydalanishga topshirilgan, yillik ishlab chiqarish quvvati 1 700 000 tonna bo‘lgan gidrotozalash qurilmasida jahon talablariga to‘liq javob beradigan dizel yoqilg‘isi ishlab chiqarilmoqda. Bundan tashqari, zavodda tozalangandan so‘ng ajralib chiqadigan gazlardan mahsulot tarkibi kamida 99,99% bo‘lgan oltingugurt ishlab chiqarish va qadoqlash yo‘lga qo‘yilgan. Dizel yoqilg‘isidan olinadigan texnik oltingugurtga kimyo sanoati va qishloq xo‘jaligi sohasida talab katta bo‘lib, bu zavod mahsulotlariga qo‘shimcha qiymat qo‘shmoqda, – deydi Farg‘ona neftni qayta ishlash zavodi direktori o‘rinbosari, bosh muhandis Dilshod O‘rinboyev.
Farg‘ona NQIZ ilg‘or texnologiyalarni joriy etishda davom etib, mahsulot sifatini muntazam oshirishga intilmoqda. Bugungi kunda zavod taraqqiyot va innovatsiya timsoli bo‘lib, O‘zbekiston iqtisodiyotida muhim o‘rin tutib, mamlakat neftni qayta ishlash sanoati rivojiga salmoqli hissa qo‘shyapti.
Yubileying muborak, Farg‘ona NQIZ! Kelgusi 65 yil yangi yutuqlar, yangiliklar va muvaffaqiyatlarga to‘la bo‘lsin.
Farg‘ona NQIZ matbuot xizmati
